“Em Städtle – neies oder au edd!”

Es ist wieder einmal Markttag und wie immer um die Fasnetszeit in Wendlingen begegnen sich auf diesem Platz zwei ältere Damen. Sie heißen Walhalla und Waltruda. Sie sind zwei der drei Frauen, die vor über 40 Jahren mit der Narretei der Nelau-Hexen begonnen haben. Walhalla läuft mit naja recht großen Schritten über den Marktplatz und begegnet hier wieder einmal Waltruda. Mit leicht geneigtem Kopf schaut sie Waltruda an und zeigt immer in eine Richtung, dort wo ein Bauzaun steht und noch etwas Sand auf dem Boden verstreut liegt.

Waltruda: Walhalla, sag amol, isch dirs et guat, hosch du ebbes mit em Kopf, du zeigsch emmer en oi Richtong ?

Walhalla: I hab nix mit em Kopf, aber guck halt amol do nomm

Waltruda: Joh, des dua ih jo, aber außerma Bauzau seh ih nix was vo Interesse sei keht

Walhalla: Also, ih erklär dir´s jetzt amol. Em Sommer han ih mir an neia Bikini zuaglegt ...

Waltruda: Was hosch du! Do koh ih nemme, en deim Alder ond mit derra Figur!

Walhalla: Des isch jo jetzt mol Nebasächlich, also no wollt ih ens Freibad ganga ond meine anderthalb Bahna schwemma ond was muaß ih do seha, zua war´s amol wieder, midda em Sommer beim beschta Wedder.

Waltruda: Ach, des isch doch nix Neiss, kaum wieder Grichtat scho wieder he!

Walhalla: Genau! Also han ih denkt, dort driba geiht´s doch Desjohr an Schtadtschtrand!

Waltruda: Ach deswega soll ih do nomm gugga

Walhalla: Ha jo, also ben ih do no ganga ond was muass ih do seha, älles war do bloss koi Wasser, also koi Meer oder koi See wo ih meine anderthalb Bahna schwemma hät könna, ond sowas nennt mr dann Schtadtschtrand ….

Waltruda: Do isch hald mol wieder viel Wend om eigentlich nix gmacht worra.

Walhalla: Ond dann hab Ih do nomol äbbas, hosch du scho amol em Birgerbüro äbbas erlediga wella ?

Waltruda: Jo, han ih, aber ih ko dr Saga des war ed so oifach, weil bis ih durchblickt han welches Knepfle ih drucka muass om zom Beisbiel gelbe Säck zom kriega, oh je ….

Wallala: Do kosch recht han, so isch´s mir´s au scho ganga

Waltruda: Also han ih oifach mol druff druckt ond han dann so a Nümmerle kriagt, war I glaub dia Nummer 25, war aber koiner vor mir do, dann han ih so bei mir denkt, des ko jo lang daura womöglich bis I dro ben, ond kaum han ih ausdenkt ...

Walhalla: Jo, des denka goht halt bei ons au nemme so schnell ...

Waltruda: Noi noi, scho ben ih droh gwesa, hann eigentlich glei zwoi oder drei gelbe Sackrolla wella, aber wahrscheinleich aus Spargründen, weil mr liast jo dass dia Stadt schbara muass, han ich blos oi Roll kriagt.

Walhalla: I glaub, mir fählad do dia Worte

Waltruda: Genau so isch es. Aber jetztad zom eigentlicha was ih dir no Saga han wella

Walhalla: Na sag halt scho

Waltruda: Na guat, am Doschtig, des wär nächschde Woch dr Schmotzige (12.2.2026) isch wieder amol dr Rothaussturm der um 18 Uhr ofanga duat, drvor machad dia Kitas mit dr Narrazunft, also mit de Nelau-Hexa, wieder an Omzug der om 15 Uhr ofängt, mr läuft dann vom Dorog-Platz zom Rothaus. Glei drnoch goht´s dann auf em Marktplatz mit em Kinder-Narratreiba weider, für Verpflegung ond Musik isch durch dr Gesamtelternbeirat der Kitas ond em Musikverei Unterboihingen beschtens gsorgd.

Walhalla: Ond noch am Rathaussturm goht´s dann au glei weider mit em MVU, de Nelau-Hexa ond dr Narraparty, also kommad au do drzua älle, es lohnt sich auf jeden Fall bei derra guada Musik ond Stemmong.

Waltruda: Hosch recht! Also zemma! drei – vier - Achtong, Achtong, ihr Narra kommat au en Schara!

Waltruda ond Walhalla: na dann, Nelau He!

Beide Damen sind sehr zufrieden mit dem Gesagten und Besprochenen und verlassen mit seligem ond au a bissle närrischem Blick den Marktplatz.