Mundartgedicht zur Kirchturmsanierung

Wand nach Rauberg gehsch

do siehsch schun vun weitem

en scheene Ooblick

Wie vor lange Zeiten

*

Er guckt iwwer de Wengert

Und der Audoboh empor

Steht do schun länger

So ugfähr oi-hunnert Johr

*

Er isch des Zentrum

Der Weinbaugemeinde

Die Leit kumme zamme

Wann ma hert sei Geleide

*

Sieht gut aus em Schnee

Oder bei Sunnestrahl

er steht in unserm Herze

De Dom vum Angelbachtal.

*

Jeder kennt unsern Bau

Hausnummer Acht en de Wieslocher Stroß

Sogar des Landratsamt schätzt en

Als Hinnergrund fa Blitzerfotos

*

Schun als Kind isch ma nei

Spädeschdens zur Erschdkommunion

Auch zur Firmung mim Bischof

Ischs e Inschtitution

*

Ob Kindsdaaf-

oder Trauerfeier

Ob im Dreikeenichsgwand

oder mit Hochzichschleier

*

Denooch naus uffd Kerchestaffl

E Glässl Sekt getrunge

E Grubbefodo gmacht

Des sin echte Rauberja Erinnerunge

*

Doch der Zahn der Zeit

Lässt Spuren zurück, gar viele

Muss der Turm doch immer lenge

Des schlechte Wetter ab nach Diele

*

Ob vum Wind oder

vum schwere Glocke-Klöppl

Ihr hebts en de Zeitung gelese:

Die Fassade brögglt

*

E Sanierung isch notwendig

Jetzt guckt sie eich oo

Unser scheeni Kerch sieht aus

Wie e Kunschdwerk von Chrischdo

*

Des Gerüschd werd uns

Noch E ganzi Weil begleide

Bis sie wider schee aussieht

Wie zu alde Zeide

*

Ich will eich erinnern

Alle wu do, un in der Umgewung lewe

Überlegt emol:

Was hot der Turm eich gegewe?

*

Er bietet Orientierung

uffem Hoomweg ens warme Bett

Lengt die Blitze ab vun de Haiser

Zeigt die Zeit oo, ganz ohne App

*

Wanns em sechse Leit

Dann werd's Zeit fas Verschber

Un wer gschdorwe isch

woisch a net als Letschder

*

Un was war drin?

Jetzt heißts Elektronisches Faschde

Man merkts erschd wann er fehlt

Unsern geliebte Mobilfunkmaschde

*

Unsern Turm mitsamt Kerch

isch eine Herzenssache

Ein stück Heimat von uns

Mir müsse ihn gut bewache

*

Ihr seid mit em Uffgwachse

Losst en jetzt net im Stich

Zeigt offen einander

dass wichtig er isch

*

Was unsere Ahnen geschaffen

Mit Mut und viel Fleiß

Müsse mir erhalde

Um jeden Preis!

*

Drum hab ich e Bitte

Dud eiern Geldbeidl ausschütte

Spende auch du

für die Rauenberger Dombauhütte

*

Tristan J. Beyerer, Dezember 2025
Erstmals präsentiert auf der Winterfeier des MGV „Sängerbund“ am 17.01.2026

(BeSt)

Spendenkonto Förderverein Kirche St. Peter und Paul

„Sanierung Kirchturm“

DE12 6729 2200 0013 8237 07

(Volksbank Kraichgau)